Gjykata e Apelit e Kosovës ka refuzuar ankesën e mbrojtjes së të akuzuarit Eset Berisha për përjashtimin e gjyqtares Violeta Namani-Hajra nga gjykimi në rastin e njohur si “53-milionëshi”. Me këtë vendim, Apeli ka vërtetuar qëndrimin e Gjykatës Themelore, duke lejuar që gjyqtarja Namani-Hajra të vazhdojë me trajtimin e çështjes.

Kjo është konfirmuar nga mbrojtësja e të akuzuarit Berisha, avokatja Teutë Xhema.

“Ankesa është refuzuar”, ka deklaruar avokatja Xhema për “Betimi për Drejtësi”

Seanca e rigjykimit në këtë rast është caktuar të mbahet më 23 korrik 2025.

Vendimi i Gjykatës së Apelit vie pas atij të Themelores së e cila kishte refuzuar kërkesën për përjashtimin e Namani-Hajrës për gjykimin e 53 milionshit e të cilin vendimin mbrojtja e Berishës e kishte atakuar me ankesë për në Gjykatën e Apelit.

Në seancën e rigjykimit më 14 maj 2025, i akuzuari Eset Berisha kërkoi përjashtimin e gjykatëses Namani-Hajra. Avokatja e Berishës, Teutë Xhema, tha në atë sancë se këtë kërkesë e kanë bërë për shkak të dyshimit për mungesë të paanshmërisë.

Gjykata Themelore në Prishtinë më 31 janar 2024 i shpalli fajtorë dhe i dënoi me 10 vjet e 3 muaj burigm (së bashku): Pal Lekajn, Eset Berishën, Nebih Shatrin dhe Besim Tahirin për rastin e njohur si “53-milionëshi”.

Sipas aktgjykimit të Themelores, Pal Lekaj u dënua me 3 vite e 8 muaj burgim efektiv. Ndaj tij, gjykata shpalli edhe dënim plotësues, ndalimi i ushtrimit të funksionit publik në administratë publike ose në shërbimin publik në kohëzgjatje prej 3 vite e 6 muaj.

Nebih Shatri u dënua me 1 vit e 8 muaj burgim, kurse Besim Tahiri u dënua me 1 vit e 8 muaj burgim. Ndaj tyre u shpall edhe dënim plotësues, ndalim i ushtrimit të funksionit publik në administratë publike ose në shërbimin publik në kohëzgjatje prej 2 vitesh. Ndërsa, Eset Berisha u dënua me 3 vite e 3 muaj burgim.

Po ashtu, ndaj Berishës u shpall edhe dënimi plotësues ndalimi i ushtrimit të funksionit publik në administratë publike ose në shërbimin publik në kohëzgjatje prej 3 vitesh.

Por, Gjykata e Apelit e ka kthyer në rigjykim rastin ndaj Pal Lekajt, Eset Berishës, Nebih Shatrit dhe Besim Tahirit,

“Betimi për Drejtësi” kishte raportuar lidhur me përmbajtjen e vendimi të plotë të përpiluar nga Themelorja në Prishtinë, duke publikuar gjetjet e gjykatës nga mbrojtja e të akuzuarve dhe gjetjet nga deklaratat e dëshmitarëve. Po ashtu, edhe për gjetjet e Apelit.

Sipas aktakuzës së ngritur më 4 shkurt 2022 nga Prokuroria Speciale e Republikës së Kosovës, Pal Lekaj, në cilësinë e ministrit të Ministrisë së Infrastrukturës (MI), Eset Berisha, këshilltar i lartë politik i tij, Nebih Shatri, si sekretar i Përgjithshëm në këtë ministri, në bashkëveprim dhe me dashje edhe me të pandehurin Besim Tahiri, drejtor i Prokurimit Publik në MI, akuzohen për keqpërdorim të detyrës zyrtare me rastin e ndarjes së 53 milionë eurove për konsorciumin “Bechtel &Enka”, për ndërtimin e autostradës Prishtinë – Hani i Elezit apo e njohur ndryshe si autostrada “Arbën Xhaferi”.