Policia e Kosovës e ka dërguar në mbajtje një person tek i cili janë gjetur armë, municion e gjëra të tjera të ndaluara, konkretisht në pjesën malore të një fshati të Leposaviqit, raporton gazeta online Reporteri.net. 

Përmes një komunikate për media, bëhet e ditur se nën dyshimin që ky i fundit posedon edhe armë të tjera, është kontrolluar shtëpia e tij, ku gjatë kontrollit janë gjetur një armë gjysmë automatike, një pushkë, një pushkë ajrore, fishekë kalibrash të ndryshëm, disa thika e një xhaketë me pajisje tjera ushtarake.

“Dërgohet në mbajtje një person tek i cili janë gjetur disa armë, municion e gjëra tjera të ndaluara Policia e Kosovës, gjatë realizimit të detyrave dhe autorizimeve policore për të ofruar rend e siguri, në pjesën veriore të vendit, konkretisht në pjesën malore të një fshati të Leposaviqit, kanë hasur një person të dyshuar me një pushkë gjuetie me municion. Nën dyshimin e bazuar se personi i dyshuar R.M., (viti i lindjes 1976, mashkull kosovar) posedon edhe armë tjera, është kontrolluar shtëpia e tij. Gjatë kontrollit janë gjetur edhe: një armë gjysmë- automatike, një pushkë 8.75mm, një pushkë ajrore, fishekë kalibrash të ndryshëm, disa thika e një xhaketë me pajisje tjera ushtarake”, thuhet në komunikatë.

Në përfundim, thuhet se për rastin është njoftuar prokurori, me akt-vendim të të cilit i dyshuari është dërguar në mbajtje deri në 48 orë.

/Reporteri.net/.