Asociacioni i Komunave të Kosovës: Pushteti qëndror nuk u koordinua me atë lokal për masat e reja anti-COVID

Sazan Ibrahimi, drejtori ekzekutiv i Asociacionit të Komunave të Kosovës është deklaruar pas mbledhjes së MSH’së se pushteti qëndror nuk ka pasur koordinim me atë lokal për masat e reja të ndërmarra nga institucioni shëndetësor.


“Deri më tani, çdo vendim mbi masat e reja është bërë në konsultim me komunat. Komunat në këtë rast ende nuk janë konsultuar për çfardo mase të re”, ka deklaruar Ibrahimi për Express.

“Kryetarët e komunave gjithnjë deri më tani kanë treguar gatishmëri të lartë për të bashkëpunuar me nivelin qëndror në mënyrë  që të shpëtohet jeta e qytetarit”, ka shtuar tutje ai.

Ndryshe, kryetari i Shoqatës së Gastronomëve, Petrit Kllokoqi, në një prononcim për Gazetën Online “Reporteri”, ka thënë se gjatë këtij takimi është diskutuar që vendi të mbyllet për 12 ditë nga dita e martë.

“Po është diskutuar që shkollat, kafeteritë dhe qendrat tregtare të mbyllen për 12 ditë nga e dita e martë, javën e ardhshme. Ne jemi kundër kësaj”, tha ai për Reporterin.

Po ashtu, Kllokoqi tha se në këtë takim është diskutuar lidhur me rritjen e rasteve me koronavirus në Kosovë ditëve të fundit.

Ndërkaq, kapacitetet spitalore kanë zënë që të shterohen, pasi që në Klinikat e QKUK-së është një numër shumë i madh i pacientëve të cilën po trajtohen për COVID-19.

Ende nuk dihet se kur do të merret ndonjë vendim për masat e reja anti-COVID nga organet kompetente.