Drejtori i Klan Kosovës, Baton Haxhiu ka bërë të ditur se do të largohet nga ky medium për t’iu përkushtuar projekteve të reja.

Haxhiu nuk ka treguar se cili do të jetë angazhimi i tij i radhës, por ka thënë se i duhet të lëvizë drejt një caku e adrese të re, çka sipas tij nuk e ka aspak të lehtë, shkruan Reporteri.net.

“Sot është krejt ndryshe.Liderizmi i Klan Kosovës në skenën mediale, investimi në gjenerata të reja, ndërtimi i modeleve të reja të gazetarisë dhe stabiliteti i përgjithshëm janë arritje për mburrje dhe krenari. Për mua dhe për të gjithë që kanë qenë pjesë e tij.Njëkohësisht, janë shenjë e qartë që ky cikël është përmbyllur. Kam arritur në cak.
Më duhet të lëviz. Drejt një adrese të re, një sfide tjetër.Nuk e kam të lehtë, por e këtillë është jeta ime. Ky jam unë”, ka shkruar ndër të tjera ai.

Letra e tij e plotë;

Jetën time nuk e paramendoj pa sfida të mëdha.I kërkoj, por edhe më gjejnë. S’ua kam frikën.
E kam kuptuar moti: sfidat profesionale më mbajnë gjallë në gazetari. Ato u japin energji ditëve të mia të punës, me lumturi dhe mërzi, mirësi e zhgënjime.

Në gazetë ditore, revistë javore, ose në studio televizive – esenca mbetet e njëjtë. Ta them atë që mendoj se duhet të thuhet, të kërkoj përgjigje, të kontribuoj në sferën publike. Të bashkëpunoj me njerëzit dhe profesionistët më të mirë.Më shumë se 30 vjet kështu.Dhe Klan Kosova.

Klaan Kosova është pjesa më e bukur e karrierës sime.Fillime idealiste me paqartësi e pasiguri, duke parë e duke bërë, me pasion, entuziazëm dhe vullnet të pakrahasueshëm me cilindo projekt tjetër medial kosovar në dekadat e fundit.
Energji fantastike e djemve dhe vajzave që u shndërrua në uragan kreativ. Çdo ditë rriteshim dhe ndryshonim për të mirë në hapësira të vogla me shumë ide.

Sot është krejt ndryshe.Liderizmi i Klan Kosovës në skenën mediale, investimi në gjenerata të reja, ndërtimi i modeleve të reja të gazetarisë dhe stabiliteti i përgjithshëm janë arritje për mburrje dhe krenari. Për mua dhe për të gjithë që kanë qenë pjesë e tij.Njëkohësisht, janë shenjë e qartë që ky cikël është përmbyllur. Kam arritur në cak.
Më duhet të lëviz. Drejt një adrese të re, një sfide tjetër.Nuk e kam të lehtë, por e këtillë është jeta ime. Ky jam unë.
Jemi Një.
Përjetësisht.Me dashuri,
Batoni