Ministri i Jashtëm rus Sergei Lavrov deklaroi se Rusia mbështet çdo marrëveshje që Beogradi dhe Prishtina arrijnë vullnetarisht.

Ndonëse duket befasi, Moska zyrtare nuk është distancuar nga Serbia edhe pas takimit jo shumë të dëshirueshëm për ta që u mbajt në Uashington.

“Ne, natyrisht, siç ka thënë në mënyrë të përsëritur Presidenti Vladimir Putin, do të mbështesim me vendosmëri Serbinë në hapat që gjykon se është e nevojshme të ndërmerren brenda kornizës së Rezolutës 1244 të Këshillit të Sigurimit të KB dhe ne do të mbështesim të gjitha marrëveshjet e arritura vullnetarisht midis Beogradit dhe Prishtinës”, tha kryediplomati rus në një konferencë shtypi, raporton Tanjug.

Sidoqoftë, zëdhënsja ruse Maria Zakharova nuk ishte aq miqësore ditëve të fundit, pasi ofendoi rëndë presidentin serb, Aleksandar Vuçiq. Megjithatë, ajo kërkoi falje.

Ndryshe, Serbia e Rusia vazhdimisht potencojnë se kanë marrëdhënie të mira, saqë muajt e fundit shteti serb u armatos nga ai rus, transmeton Reporteri.net.