Sekretari i Shtetit Antony Blinken u takua të premten me presidentin e Autoritetit Palestinez Mahmoud Abbas në Aman për të diskutuar pasojat e sulmit terrorist të Hamasit ndaj Izraelit, veçanërisht pasojat në Bregun Perëndimor të pushtuar.

Vizita e Blinken në Jordani vjen pas takimi të Blinken me zyrtarë izraelitë si dhe me njerëz të prekur drejtpërdrejt nga sulmi dhe lufta, e cila ka vrarë më shumë se 1300 izraelitë dhe të paktën 27 amerikanë.

Blinkeni ka potencuar se është koordinuar me partnerët për të parandaluar zgjerimin e konfliktit.

“Pata rastin të takohem me presidentin e Autoritetit Palestinez, Abbas për të diskutuar mbi sulmet e neveritshme terroriste të Hamasit kundër Izraelit. Kam detajuar përpjekjet e ShBA-së për t’u koordinuar me partnerët për të parandaluar zgjerimin e konfliktit”, ka shkruar Blinkeni në platformën “X”.

Blinken u takua gjithashtu me Mbretin Abdullah II të Jordanisë, me të cilin Presidenti Joe Biden ka qenë në kontakt që nga shpërthimi i krizës.

Udhëheqësi jordanez ka shërbyer si një ndërmjetës kyç në negociatat lidhur me Lindjen e Mesme gjatë disa dekadave.