Valë sulmesh me dronë dhe raketa goditën Kievin, në atë që konsiderohet si sulmi ajror më i madh që nga fillimi i luftës së Rusisë në Ukrainë, duke lënë të plagosur 23 persona dhe duke shkaktuar dëme në disa rajone të kryeqytetit.

Forcat ajrore të Ukrainës thanë se Rusia lëshoi gjithsej 550 dronë dhe raketa në të gjithë territorin e Ukrainës gjatë natës. Shumica ishin dronë të tipit Shahed, ndërsa në sulm u përdorën edhe 11 raketa.

Gazetarët e Associated Press në Kiev dëgjuan gjatë gjithë natës zhurmën e pandërprerë të dronëve mbi qytet, shpërthime të fuqishme dhe të shtëna të dendura armësh ndërsa forcat ukrainase përpiqeshin të zmbrapsnin sulmin ajror.

Kievi ishte objektivi kryesor i sulmit. Sipas kryetarit të bashkisë Vitali Klitschko, të paktën 23 persona janë plagosur, ndërsa 14 prej tyre janë shtruar në spital.

Mbrojtja ajrore e Ukrainës rrëzoi 270 objektiva, përfshirë dy raketa lundruese. Ndërkohë, 208 objektiva të tjerë u zhdukën nga radarët dhe dyshohet se janë penguar përmes ndërhyrjeve elektronike.

Rusia goditi me sukses tetë lokacione, duke përdorur nëntë raketa dhe 63 dronë. Mbeturina nga dronët e rrëzuar ranë në të paktën 33 lokacione në qytet.

Shërbimi Ukrainas i Radios Evropa e Lirë raporton se nga sulmi janë dëmtuar disa segmente të hekurudhës.

“Trenat e udhëtarëve nga pjesa perëndimore po qarkullojnë në një itinerar të devijuar përmes Vyshneve dhe Darnytsia, gjë që po shkakton vonesa deri në dy orë. Aktualisht, linja Kyiv City Express operon vetëm në gjysmërrethin verior Svyatoshyn – Pochaina – Darnytsia (në të dy drejtimet). Për shkak të kombinimit me trenat e udhëtarëve, janë të mundshme devijime nga orari”, thuhet në njoftimin e autoritetit të hekurudhës së Ukrainës.

Sulmet kanë dëmtuar edhe pjesë të infrastrukturës rrugore.

Sulmi ndodhi vetëm disa orë pasi presidenti amerikan Donald Trump zhvilloi një bisedë telefonike me presidentin rus Vladimir Putin dhe dha komentet e para publike për vendimin e administratës së tij për të pezulluar disa dërgesa armësh për Ukrainën.

Ky vendim përfshin municione si raketat Patriot, raketat ajër-ajër AIM-7 Sparrow dhe raketat më të shkurtra Stinger, të cilat janë të domosdoshme për të ndaluar raketat dhe dronët që vijnë nga Rusia, si dhe për të rrëzuar avionët rusë.

Kanë kaluar më pak se shtatë ditë nga sulmi ajror më i madh i mëparshëm i Rusisë gjatë luftës. Forcat ajrore të Ukrainës kishin raportuar se Rusia kishte lëshuar 537 dronë, mjete mashtruese dhe 60 raketa në atë sulm.

Shërbimet emergjente raportuan dëme në të paktën pesë nga dhjetë distriktet e kryeqytetit./REL