Qeveria e Shteteve të Bashkuara ka raportuar një nivel historikisht të lartë të dëbimeve dhe arrestimeve gjatë këtij viti fiskal, duke tejkaluar rekordet e mëparshme.
Departamenti i Sigurisë Kombëtare (DHS) njoftoi të mërkurën se Shërbimi i Emigracionit dhe Doganave (ICE) kreu 483,200 dëbime dhe më shumë se 491,000 arrestime që lidhen me emigracionin gjatë vitit 2026.
Numri i përgjithshëm i dëbimeve thyen çdo rekord në historinë 23-vjeçare të ICE-së, përfshirë rekordin e mëparshëm prej 442,640 dëbimesh të regjistruar në vitin 2025.
Raporti vjen pak ditë pasi presidenti i SHBA-së, Donald Trump, pranoi se masa e ashpër e administratës së tij ndaj emigracionit mund të ketë qenë “tepër e rreptë”.
“Viti fiskal 2026 shënoi numrin më të lartë të dëbimeve dhe arrestimeve nga ICE-ja në krahasim me çdo vit tjetër në historinë e këtij institucioni. Shtatori i vitit 2026 ishte shtatori më intensiv në historinë e ICE-së për sa i përket arrestimeve”, deklaroi Sekretari i Sigurisë Kombëtare, Markwayne Mullin.
ICE-ja njoftoi se ka kryer më shumë se 48,000 arrestime gjatë muajit shtator, duke mbyllur kështu një periudhë dymujore me shifra rekord, të cilat në muajin gusht arritën në 50,925.
“Nuk ka dyshim se administrata ka intensifikuar zbatimin e ligjit më shumë se çdo president tjetër më parë. Ekzistojnë gjithashtu prova se numri i emigrantëve të paligjshëm është ulur ndjeshëm, si pasojë e largimeve të shtuara nga vendi, të nxitura nga frika ndaj masave të zbatimit të ligjit”, ka thënë për Al Jazeera, Steven Camarota, drejtor kërkimor në Qendrën për Studime të Emigracionit (CIS) me seli në Uashington, D.C.
Megjithatë, ai vuri në dukje paqartësi në shifrat e publikuara nga DHS-ja.
“Sigurisht, të dhënat janë gjithmonë të paplota dhe është e vështirë të maten. Lidhur me shifrat specifike të bëra publike sot, çështja kryesore që nuk kam arritur të përcaktoj është se çfarë përqindjeje e këtyre individëve i përkasin zbatimit të ligjit brenda vendit, sa janë dëbime nga brendësia e Shteteve të Bashkuara dhe sa janë persona që janë kthyer mbrapsht në kufi apo në aeroporte”
