Presidenti i SHBA-së, Donald Trump ka zhvilluar atë që ai e përshkroi si një telefonatë “shumë të mirë” një orëshe me homologun e tij ukrainas Volodymyr Zelensky, një ditë pasi foli me presidentin rus Vladimir Putin.

Zelensky tha më pas se ai besonte se “paqja e qëndrueshme mund të arrihet këtë vit” nën udhëheqjen e Trump, raporton BBC.

U diskutua gjithashtu pronësia e mundshme e SHBA-ve mbi termocentralet bërthamore të Ukrainës, tha Shtëpia e Bardhë, megjithëse Zelensky më vonë deklaroi se kjo ishte vetëm për objektin e Zaporizhzhia të mbajtur nga Rusia.

Toni i bisedës duket se është në kontrast me vizitën e Zelenskyt në Shtëpinë e Bardhë muajin e kaluar, në të cilën të dy udhëheqësit – së bashku me Zëvendës Presidentin e SHBA-së, JD Vance – u përfshinë në një shkëmbim të tensionuar.

E mërkura shënoi herën e parë që të dy liderët  kanë folur që nga takimi në Zyrën Ovale – megjithëse që atëherë, ekipet e tyre janë takuar në Arabinë Saudite dhe kanë negociuar një armëpushim të propozuar 30-ditor.

Ndërsa mbështetet nga Ukraina dhe SHBA, Putini hodhi poshtë propozimin për një pauzë të gjerë në konflikt gjatë telefonatës së tij me presidentin amerikan të martën.

Gjatë bisedës së tij me Trump, Zelensky tha se ishte i hapur për një armëpushim të pjesshëm që përfshin një ndalim të  sulmeve  në infrastrukturën energjetike, hekurudhat dhe objektet portuale që mund të vendoseshin shpejt – por presidenti ukrainas paralajmëroi se vendi i tij do të hakmerrej nëse Moska shkel kushtet e armëpushimit./Reporteri.net/