Presidenti Hashim Thaçi ka hedhur firmën në dekretin për shpalljen e Gjendjes së Jashtëzakonshme, pas takimit të Këshillit Kombëtar të Sigurisë.
Këtë e ka bërë të ditur presidenti përmes një postimi në Twitter.
Reporteri.net ka mësuar se Presidenca dekretin në Kuvend do ta dërgojë në ora 13:00.
Pasi ta pranon zyratirsht dekretin nga presidenti, Kuvendi i Kosovës duhet të mblidhet brenda 48 orëve ku deputetët do ta thonë fjalën e tyre.
Neni 131 i Kushtetutës së Kosovës, pika 4 thotë, se Kuvendi mund ta japë pëlqimin e tij brenda 48 orësh me shumicën e votave të të gjithë deputetëve të pranishëm dhe që votojnë lidhur me pëlqimin e dekretit të Presidentit.
Partitë në pushtet, VV e LDK janë të ndara, pasi e para ka thënë se janë kundër që të shpallet gjendje e jashtëzakonshme, pasi sipas tyre deri tani janë marrë të gjitha masat e nevojshme, kurse Isa Mustafa ditë më parë u shpreh pro gjendjes së jashtëzakonshme për shkak të gjendjes së koronavirusit.
Ndërsa AAK do të vendos në ora 13:00 nëse do ta mbështetë Thaçin apo jo, kurse kreu i NISMA-s në orën 13:30 do të mbajë një konferencë për media ku pritet ta bëjë të ditur qëndrimin e partisë së tij.
Ndërsa kundër Thaçit ka dalë edhe Lista Serbe. /Reporteri.net/.