Daut Haradinaj ka një arsyetim për punësimet dhe disa fjalë për Thaçin

Deputeti i AAK-së, Daut Haradinaj ka folur për çështjen e punësimeve të militantëve nëpër institucioneve, për çka kjo parti dhe NISMA janë akuzuar javëve të fundit se po i rehatojnë familjarët dhe njerëzit e tyre të partisë.


Ai ka thënë se pasi që partia e tij është kthyer në Qeveri ka pasur një presion të madh nga njerëzit e saj për t’i punësuar, por nuk sheh dëm të madh punësimin e njerëzve të partisë.
“Nuk mendoj se gjithë Kosova është dëmtuar pse janë punësuar 100 persona nga AAK-ja. Nuk ka ndonjë dëm të theksuar”, tha Haradinaj.

Ai ka thënë se gjatë këtyre 15 viteve ka pasur shumë persona që kanë mbaruar universitete prestigjioze, por nuk u është dhënë mundësia për punësim.

“Askush nuk po i prezanton CV-të e këtyre të punësuarve. Ka pasur njerëz që kanë mbaruar universitet amerikan, kanë qenë krye menaxher të bankave, kanë qenë prorektorë, sot atyre po u pamundësoka të punësohen?”, ka deklaruar Haradinaj në Dukagjin.

Daut Haradinaj ka folur edhe për presidentin aktual.

“Hashim Thaçi nuk është ani- Kosovë”, tha Haradinaj.

Ndërsa lidhur me idenë e shkëmbimit të territoreve, tha se kundërshtojnë fuqishëm një ide të tillë, duke thënë se po luhet edhe me ndjenjat e shqiptarëve të Luginës së Preshevës.