Sot gjatë ditës se deputeti i AAK-së Daut Haradinaj u raportua se u ndalua në Vjenë, bazuar në fletëarrestet ndërkombëtare të lëshuara nga Serbia.

Por, këtë lajm e ka mohuar vet Daut Haradinaj, ndërsa bën të ditur se ka pasur vetëm një konsultim me policinë.

“Lajmi nuk është i vërtetë, ishte vetëm një konsultë disa minutëshe me policinë në aeroport. Nuk ka të bëjë as me ndalim dhe as me arrestim. Jam në Vjenë i lirë dhe duke u bazuar në planin tim”, ka deklaruar Haradinaj për Klan Kosova.

Ai më tej thotë se policia është treguar korrekte ndaj tij.

“Falënderoj policinë dhe shtetin austriak për korrektësinë e vazhdueshme, si në këtë rast, ashtu edhe në mbështetjen e vazhdueshme të cilën ia kanë dhënë Kosovës pa rezervë. Mesazhi im për miqtë dhe dashamirët të shqetësuar, jam i lirë dhe jam shumë mirë. Shumë shpejt takohemi në Kosovë – i falënderoj të gjithë për mbështetjen”, ka deklaruar Hardinaj.

Kujtojmë se deputeti i AAK-së pas publikimit të lajmit për arrestimin e tij reagoi përmes një postimi në Facebook ku postoi një foto nga sheshi i Vjenës.