Një shtetas kosovar i moshës 32 vjeçare ka goditur me thikë gruan e vet me ç’rast i ka shkaktuar plagë të rënda në qafë.

Sulmi ka ndodhur të hënën në Morges (Morzh), Kantoni Vaud.

Policia e Kantonit Vaud ka njoftuar se pasditen e të hënës në Morges kishte ndodhur një grindje e ashpër.

Policinë e kishin alarmuar rreth orës 16.40, shkruan blick.ch, transmeton albinfo.ch. Me të arritur në vendin e ngjarjes, policët gjejnë një kosovare të moshës 28 vjeçare të plagosur rëndë. Ajo ishte e shtrirë para hyrjes së shtëpisë në të cilën banonte.

Kalimtarët e rastit i kishin dhënë viktimës ndihmën e parë dhe pastaj ajo është dërguar në spital ku tashmë është jashtë rrezikut për jetën .

Një zëdhënës policie ka thënë për gazetën se atë e kishte plagosur në qafë duke e goditur me thikë bashkëshorti i saj, 32 vjeçar.

Në njoftimin për media sulmi identifikohet si tentim vrasjeje. I dyshuari është arrestuar.

Sipas njohurive të para, dy personat ishin të martuar por jetonin prej disa muajsh të ndarë.