Zëvendëskryeministrja dhe ministrja e Punëve të Jashtme dhe Diasporës, Donika Gërvalla ka reaguar për ndryshimin për Ligjin për Zgjedhjet e Përgjithshme. Ajo ka thënë se gjatë fushatës kanë premtuar që Diasporës do t’u mundësohet votimi nga ambasadat në vendet ku jetojnë.

“Kemi premtuar që ligji i parë që do të miratohet gjatë mandatit tonë do të jetë ai që i mundëson mërgatës të votojë në ambasadat dhe konsullatat tona. Sot po fillojmë me hapat e parë në këtë drejtim”, tha ajo.

Sipas Gërvallës ligji i radhës do të jetë ai për konfiskimin e pasurisë së paligjshme.

“Shumë ligje të tjera do të vijojnë si rezultat i vullnetit të shprehur qytetar pêr ndryshim më 14 shkurt. Ndryshimi duke ndejtur dhe duke pritur nuk vjen. Nevojiten hapa të shpejtë dhe të guximshëm.

Zgjedhja e Presidentes është çështje ditësh dhe po pritet me padurim nga të gjithë. Atë nuk mund ta ndalin lojërat destruktive me numra.  Askush nuk ka të drejtë të injorojë vullnetin e shprehur të qytetarëve. Kemi shumë punë për të bërë”, ka shkruar ajo ën Facebook.