Dyshohet se sulmoi seksualisht një fëmijë, Policia arreston 34-vjeçarin në Prishtinë

Një 34 vjeçar është arrestuar nga Policia në Prishtinë, pasi dyshohet se ka sulmuar seksualisht një fëmijë. Në njoftimin e bërë nga Policia e Kosovës thuhet se, arrestimi i personit të dyshuar është bërë sot rreth orës 14:00.


Policia bën të ditur se personi i arrestuar dyshohet se ka sulmuar seksualisht një fëmijë duke sqaruar se ai me veprimet e bëra i ka shkaktuar shqetësim viktimës.

34 vjeçari është arrestuar në Prishtinë.

“Nga denoncimi i bërë në polici janë ngritur dyshimet se i dyshuari ka sulmuar seksualisht një fëmijë, duke i shkaktuar shqetësim me veprimet e tij. Ndërkohë që janë analizuar të gjitha rrethanat që kanë karakterizuar ngjarjen, policia ka krijuar versionin e hetimit duke identifikuar, lokalizuar vendndodhjen si dhe arrestuar të dyshuarin”, thuhet në njoftimin e bërë nga Policia.

Tutje, Policia njofton se pas arrestimit me rekomandimin e prokurorit të shtetit të njëjtit i është shqiptuar masa e ndalimit prej 48 orësh.