EdGuard kundër shtyrjes së mësimit: Vendimet e tilla duhet mirë të argumentohen

Qeveria e Kosovës në mbledhjen e saj të fundit, të mbajtur në mënyrë elektronike, ka marrë vendim për masat e reja kundër pandemisë COVID-19.


Njëra nga këto vendimet është edhe shtyrja e fillimit të mësimit deri më 26 shtator.

“Aktiviteti mësimor në institucionet publike dhe private të arsimit parauniversitar, duke përfshirë edhe institucionet e arsimit parashkollor dhe të qëndrimit ditor pezullohet deri me datë 26 shtator 2021. Ky pezullim vlen edhe për aktivitetin mësimor me prezencë fizike në institucionet publike dhe private të arsimit universitar. Për familjet me fëmijë të regjistruar në institucione parashkollore dhe me dy prindër të punësuar (ose qe ka vetëm një prind dhe ai prind është i punësuar), njëri prind lirohet nga obligimi për t’u paraqitur fizikisht në punë gjatë periudhës 13 – 26 shtator 2021″, thuhet në vendim, shkruan Telegrafi.

Lidhur me këtë ka reaguar Instituti EdGuard, ku thotë se këto vendime duhet mirë të argumentohen.

“EdGuard vlerëson që vendime si ky nevojiten të mirë argumentohen. Cili është niveli i infeksionit tek fëmijët; cili është niveli i fatalitetit nga virusi mes fëmijëve; cili është niveli i transmetimit të virusit në komunitetin e shkollës?! Nëse shqetësimi institucional është në mungesë të kapaciteteve spitalore atëherë reagimi duhet të jetë në rritje të kapaciteteve jo në mbyllje të shkollave”, thuhet në reagim.

Sipas tyre, mos komunikimi me komunitetin e shkollave ka shkaktuar hamendësime.

“Mos komunikimi i hapur me komunitetin e shkollës është duke shkaktuar hamendësim dhe shqetësim që lehtë mund të kthehet në hezitim për rikthim. Rekomandimet e organizatave ndërkombëtare të shëndetit publik si WHO, CDC dhe ECDC promovojnë rikthimin në shkolla – në linjë me këtë vlerësojmë që duhet të jenë edhe vendimet e qeverisë”, vijon reagimi.


Ndryshe, përveç shtyrjes së mësimit, Qeveria ka marr vendim që t’i mbyll edhe çerdhet.