Fondi i Kursimeve Pensionale në Kosovë, ka bërë të ditur se gjatë dy ditëve të kaluara, për tërheqjen e 10% të kursimeve kanë aplikuar 270.046 qytetarë.

Fillimi i këtij procesi më 11 dhjetor u shënua me disa probleme kryesisht për shkak të pamundësisë së qasjes së qytetarëve të uebfaqen e Trustit.

Por, më pas zyrtarët e këtij institucioni, i thanë Radios Evropa e Lirë se të dhënat e kontributpaguesve në Kosovë nuk janë cenuar.

Në bazë të Ligjit për rimëkëmbje ekonomike, qytetarët do të kenë mundësi që të tërheqin vetëm 10 për qind të shumës së siguruar për kursime pensionale, që kanë fituar gjatë kohës sa kanë punuar, por edhe në bazë të vlerës së pagës që marrin.

Aplikimi online do të zgjasë katër muaj.

Të gjithë të punësuarit në Kosovë paguajnë 10 për qind kontribute pensionale nga paga e tyre: pesë për qind të shumës së përgjithshme të pagës e paguan punëdhënësi nga buxheti i tij, kurse pesë për qind paguhet nga paga e punëtorit.