Pas mbledhjes së qeverisë, në konferencë për media, Ministrja e Industrisë, Ndërmarrësisë dhe Tregtisë, Mimoza Kusari-Lila deklaroi se deri më tani ka pasur iniciativa vetëm nga Kryeministri Kurti për takime.

Ajo tha se një ftesë e tillë me shkrim siç ka kërkuar PDK-ja dhe mund të dërgohet, por theksoi nevojën për diskutime mbi parimin e zgjedhjes dhe emrat konkretë për president.

Kusari-Lila shtoi se vendi ndodhet në javën finale për zgjedhjen e presidentit, përpara rrezikut të shpërndarjes së Kuvendit dhe shkuarjes në zgjedhje.

“Po e ritheksoj që deri më tani ka pasur iniciativa vetëm nga Kryeministri Kurti. Ndërsa PDK-ja me atë çfarë kemi dëgjuar, pret ofertë me shkrim. Nëse ftesa duhet shkuar me shkrim, ndoshta edhe mund të bëhet, përkundër se duhet prapë të ulet e të diskutohet mbi parimin e zgjedhjes dhe emra konkretë të cilët edhe PDK-ja mund t’i propozojë për president të vendit. Për shkak se tashmë jemi në javën finale që duhet të zgjidhet titullari i institucionit më të lartë në vend para se të ndodhë ajo që nuk e duam, që të shpërndahet Kuvendi dhe vendi të shkojë në zgjedhje”, tha ajo.

/Reporteri.net/

“Vetëm Kurti dhe VV-ja kanë bërë propozime”, Kusari-Lila fajëson opozitën për çështjen e presidentit