Gjykata Speciale njofton se nesër nis gjykimin e parë në Hagë, ndaj Salih Mustafës

Është caktuar që gjykimi i parë në çështjen gjyqësore të ish-eprorit të Ushtrisë Çlirimtare të Kosovës, Sali Mustafa, të nisë të mërkurën më 15 shtator.


Kjo u bë e ditur përmes një komunikate për medie të Gjykatës Speciale, ku thuhet se gjykimi do të nisë në orën 09:30 në mjediset e Dhomave të Specializuara në Hagë dhe do të transmetohet me një vonesë prej 45 minutash, shkruan Reporteri.net.

“Aktakuza kundër z. Mustafa u konfirmua më 12 qershor 2020 dhe versioni përfundimtar u bë publik më 28 shtator 2020. Kundër tij janë ngritur akuza mbi bazën e përgjegjësisë penale individuale dhe përgjegjësisë penale si epror për katër krime lufte: ndalim arbitrar, trajtim mizor, torturë dhe vrasje e paligjshme. Pretendohet se krimet janë kryer në kompleksin e ndalimit në Zllash në Kosovë, në prill 1999. Në ditën e parë, Kryegjykatësja e Trupit Gjykues do të çelë gjykimin, do të kërkojë që të akuzuarit t’i lexohet aktakuza, do ta informojë të akuzuarin për të drejtat dhe obligimet e tij dhe do ta pyesë të akuzuarin nëse e ka kuptuar aktakuzën dhe nëse dëshiron t’i qëndrojë deklarimit të tij të mëhershëm. Në këtë çështje i akuzuari është vetëdeklaruar i pafajshëm”, thuhet në njoftim.

Më tej në njoftim thuhet se Zyra e Prokurorit të Specializuar do të ketë tri orë për deklaratën e vet hapëse. Më pas, mbrojtësja që përfaqëson viktimat pjesëmarrëse do të ketë një orë e gjysmë për deklaratën e saj hapëse.

“Deri më tani, si viktima pjesëmarrëse në proces janë pranuar nëntë persona dhe procesi i paraqitjes së kërkesave është i hapur. Personat që mund të demonstrojnë se kanë pësuar dëm fizik, mendor ose material si pasojë e drejtpërdrejtë e një krimi të renditur në një aktakuzë publike të konfirmuar nga DHSK-ja, ende mund të paraqesin kërkesë për pjesëmarrje në proces. Këtu përfshihen persona që kanë pësuar dëm drejtpërdrejtë, si dhe persona që kanë lidhje të ngushtë me një viktimë të drejtpërdrejtë të vrarë ose të lënduar. Trupi Gjykues ka planifikuar disa seanca për muajt shtator dhe tetor. Gjykatësit kanë bërë të ditur se Prokuroria do të ketë 87 orë për paraqitjen e provave të veta. Prokuroria ka plan të thërrasë 16 dëshmitarë, 15 prej të cilëve do të dëshmojnë në sallën e gjyqit”, thuhet në njoftim.

Ndryshe aktakuza ndaj Sali Mustafës u konfirmua më 12 qershor të vitit të kaluar dhe versioni përfundimtar u bë publik në fund të shtatorit.

Kundër tij janë ngritur akuza mbi bazën e përgjegjësisë penale individuale dhe penale si epror për katër krime lufte: ndalim arbirtrar, trajtim mizor, torturë dhe vrasje e paligjshme.

Mustafa është vetëdeklaruar i pafajshëm. /Reporteri.net