×
  • Lajme
  • Lajme / Vizita në Shqipëri

    Haziri: Blinkeni nuk erdhi në Kosovë për faj të Kurtit

    Reporteri
    22 Shkurt 2024 | 22:56

    Nënkryetari i LDK-së, Lutfi Haziri, ka thënë se në vend të Shqipërisë, Sekretari amerikan i Shtetit, Antony Blinken, do ta vizitonte Kosovën, nëse Albin Kurti do ta mbante fjalën dhe nëse do të kishte sjelljet e një burrështetasi.

    Haziri në RTV Dukagjini ka thënë se “jo”-ja e Kurtit për dinarin bëri që Blinkeni ta vizitojë Shqipërinë e jo Kosovën.

    Sipas tij, pritjet kanë qenë që Blinkeni pas vizitës në Shkup ta vizitonte Prishtinën.

    “Ka qenë vizitë e mirë, është anashkaluar Prishtina, unë e di që ajo ka qenë e planifikuar në Prishtinë, me u pas mbajt fjala, me u pas sjellë si burrështetas. Në partneritet edhe kur thuhet jo arsyetohet jo-ja, pranohet. Jam dëshmitar, ka pas situata kur kemi thënë qëndrimi ynë është ky. Tash po mungon pragmatizmi, nganjëherë ka nevojë me u arsyetu qëllimi si një fëmije 7 vjet”, ka thënë ai.

    Sipas tij, Blinkeni nuk erdhi për faj të Kurtit por edhe për fajin e presidentes Vjosa Osmani.

    “Mbajtja e fjalës nga kryeministri dhe pjesërisht nga presidentja, do ta krijonte mundësinë që sekretari i shtetit ti jep dinamikë të re dialogut. Ai nuk vjen nëse ka ndalje apo regres. Po flasim për një ngërç të madh”, tha ai.

    Haziri theksoi tutje se Kurti i ka ndërruar metodat por jo edhe qëllimet politike.

    “Kurti i ka ndryshuar metodat dhe jo qëllimet politike. Duke i ndryshu metodat ndërkombëtarët shkaktuan pritje, njëjtë edhe popullit i shkaktoi pritje. Tash po lexohet drejtë tash nuk mund të befasohet për asgjë”, tha ai.

    Haziri u shpreh se çështja e dinarit serb është barazuar tashmë me sulmin në Banjskë.

    “Ne jemi mundësuar që paratë po shkojnë për financim të terrorizmit, dhe grupeve që po sulmojnë. E kemi humb argumentin. Nuk e kemi kapitalizuar, kemi dështuar dhe e kemi barazuar një dinar në qarkullim me diçka që është shumë e madhe, që ne Serbisë duhet me ia atribuar që strehon terrorist dhe jo vetëm financon”, tha ai.

    Ndryshe, vizita e kryediplomatit amerikan po vlerësohet nga njohës të diplomacisë si historike dhe me rëndësi të madhe, jo vetëm për Shqipërinë, por edhe për mbarë rajonin e Ballkanit Perëndimor.

    Kjo ishte vizita e parë e Antony Blinken në Shqipëri dhe e gjashta e një sekretari amerikan të Shtetit.

    Në vitin 1991, Shqipërinë e vizitoi James Baker, Madeleine Albright më 2000, Colin Powell më 2003, Hillary Clinton më 2012 dhe John Kerry në vitin 2016.

     

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!