×
  • Lajme
  • Lajme

    Hyseni: Dialogu s’do të rinisë siç po thotë Kurti, do të vazhdojë aty ku ka mbetur

    Reporteri
    10 Qershor 2021 | 21:46

    Ish-koordinatori Nacional për Dialogun Kosovë-Serbi, Skender Hyseni, ka thënë që dialogu Kosovë-Serbi nuk do të rinisë, ashtu siç ka deklaruar Albin Kurti se do të ndodhë në Bruksel më 15 qershor kur edhe do të takohet me presidentin serb, Aleksandar Vuçiq.


    “Deklarata e kryeministrit Kurti se gjithçka do të nisë nga e para nuk qëndron, sepse nuk është as Kurti dhe as Vuçiq ata që mund ta imponojnë formatin e dialogut të rinisur në korrik të vitit të kaluar. Përtej asaj që e thotë njëri apo tjetri, 15 qershori shënon vazhdimin e dialogut të rinisur më 21 shkurt të vitit të kaluar, pasi është një format i cili është dakorduar dhe është harmonizuar ngushtë edhe në rrafshin e asaj që quhet marrëdhënie transatlantike”.

    Hyseni në Rubikon në Klan Kosova, i ka quajtur të parëndësishme ato çfarë thotë Kurti lidhur me këtë çështje, derisa ka theksuar se dialogu do të vazhdojë aty ku ka mbetur.

    “Unë kam dëgjuar këto ditë edhe terminologji të tekonologjisë bashkëkohore, që do të ketë një ‘reseting’ ose ‘resetim’ të dialogut. Këto janë më shumë deklarata për konsum të brendshëm, se sa që do të ndodhë realisht dhe nuk duhet të ndodhë ndryshe përpos që dialogu të vazhdojë aty ku ka mbetur, mbi bazën e atyre parimeve themelore që më kanë shërbyer mua gjatë dialogut të rifilluar në korrik të vitit të kaluar. Unë në shaka e kam quajtur Bibla dhe Kurani im, jashtë të cilit nuk do të dal. Ka rëndësi të respektojmë parimet dhe nuk ka asnjë peshë nëse dikush e quan rifillim i dialogut, vazhdim ose dialog i ri”.

    Hyseni tutje ka thënë që një “dialog i ri” bart në vete sipas tij, rreziqe të caktuara për vendin.

    “Është interes jetik i Serbisë zvarritja e mëtejme dhe ruajtja e status quos në Kosovë. Gjithnjë në pritje të një mrekullie ose një konteksti  ndryshe në marrëdhëniet globale ndërkombëtare, i cili do të ishte i favorshëm për pretendimet e Serbisë për ta rikthyer Kosovën. Serbisë nuk i ngutet në këtë dialog dhe është e paqëndrueshme edhe premisa që po flitet se Serbia gjoja ka interes të mbyllë këtë temë, sepse i duhet anëtarësimi në BE”.

    “Nuk lodhet Serbia për atë punë, për aq kohë sa mund ta zvarrisë përmbylljen e asaj që unë e quaj kontest politik dhe histori mes Kosovës dhe Serbisë , e që është përplasje historike dhe politike edhe mes shqiptarëve dhe serbëve”.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!