Instituti Hidrometeorologjik i Kosovës (IHMK) ka thënë se situata meteorologjike nuk është stabile, pasi në dy ditët në vijim “pritet të ketë reshje shiu me intensitet të lartë”.

Sipas IHMK-së, këto reshje mund të paraqesin potencial për bllokim të sistemeve të kanalizimeve, mbyllje të pusetave, shembje të dheut dhe shkarkime rrufesh.

“Situata e përgjithshme Hidrometeorologjike ditëve të fundit është jo stabile, si pasojë e reshjeve të shiut të përcjella me stuhi lokale me breshër dhe erëra të forta, duke shkaktuar edhe vërshime të shpejta sidomos të disa rrjedhave ujore me karakter malorë (rrëke, përrockat, etj). Situata e përgjithshme hidrometeorologjike në vend akoma nuk është stabile, ngase edhe sot dhe gjatë dy ditëve në vijim pritet të ketë reshje shiu vende-vende me intensitet më të lartë, të cilat mund të paraqesin potencial për bllokim të sistemeve të kanalizimeve, mbyllje të pusetave, shembje të dheut dhe drunjëve, shkarkime rrufesh etj”, thuhet në komunikatën për media.

Gjatë ditës së djeshme stuhi të mëdha shiu të përfshira edhe me breshër, përfshinë pjesë të Kosovës.

Reshjet e shiut ishin të shoqëruara edhe me breshër, që në disa rajone ra në sasi të madhe. Më së shumti u goditën rajoni i Prizrenit dhe Dragashit, pastaj Ferizaj dhe lokalisht edhe rajonet tjera.

Për pasojë shumë kultura bujqësore i dëmtuan.

Gjendje më e rënduar nga reshjet ishte në Opojë dhe fshatrat përreth, ku uji ka marrë rrugët duke depërtuar edhe nëpër shtëpi. /Reporteri.net/

Breshri i madh shkatërron kulturat bujqësore në disa pjesë të vendit