Isa Mustafa synon që pas dy vjetëve të bëhet president i Kosovës

Dëshirë e ka të bëhet president i vendit, por Isa Mustafa e pranon se për momentin kjo nuk është tema kryesore në negociatat midis Lidhjes Demokratike të Kosovës që e drejton vet dhe Lëvizjes Vetëvendosje të Albin Kurtit.


Ish-kryeministri i vendit tha në një intervistë në Zonën e Debatit, që transmetohet sonte, se në këto negociata e ka rolin kyç, ani se pyetet edhe Vjosa Osmani.

“Është një nder i veçantë që dikush me e mbyllë karrierën e vet politike me një përgjegjësi të tillë, mirëpo unë nuk jam ai që mund ta bëjë veten president e as nuk do ta imponoj veten si president”,  është shprehur ndër të tjera Mustafa.