Organizata Joqeveritare “Qika” ka protestuar lidhur me vendimin e Gjykatës Kushtetuese të Kosovës, ku u konstatua se Policia e Kosovës dhe Prokuroria e Shtetit ia kanë shkelë Sebahate Morinës të drejtën në jetë.

Nga aty, u kërkua dorëheqja e kryeprokurorit të Prokurorisë Themelore, Kushtrim Munishi dhe vartësve të tij, për siç thanë, mostrajtimin e duhur të këtij rasti.

Kjo organizatë gjatë së martës kishte mbajtur aksion simbolik para Qeverisë së Kosovës, Prokurorisë së Shtetit dhe Policisë së Kosovës me thirrjen “Kundër shtetit që i vret gratë”, lidhur me këtë çështje.

Në njoftimin nga Gjykata Kushtetuese lidhur me këtë vendim është bërë e ditur se Policia e Kosovës, përkatësisht Stacioni Policor në Graçanicë dhe Prokurori i Shtetit kanë dështuar në përmbushjen e detyrimeve të tyre për mbrojtje të jetës së Morinës. Ajo disa herë e kishte raportuar ish-bashkëshortin e saj në Polici. Këtë për herë të fundit e ka bërë dy javë para se të vritej, më 14 mars të vitit 2021.