Kërkoi ndihmë për shkak të helmimit, policia e trajton të dyshimtë vdekjen e një deçanasi

Të hënën mbrëma një person nga fshati Prilep i Deçanit ka vdekur.


Gazeta Online “Reporteri.net” ka mësuar se i njejti ishte trajtuar më parë për helmim që po dyshohet të jetë shkaktuar nga uji në Deçan.

Vdekjen e tij për Reporteri.net e ka konfirmuar edhe kryetari i Deçanit, Bashkim Ramosaj, por ka thënë se është vdekja nga nuk ka të bëjë me helmimin por me sulm në zemër.

“Nuk ka të bëjë me helmim, por ka pasuar atak kardiak”, ka thënë shkurt Ramosaj.

Rastin e ka konfirmuar zëdhënësi i Policisë për rajonin e Pejës, Driton Rugova.

“Policia është informuar se në fshatin Prilep-Deçan një person e ka gjendjen e rëndë shëndetësore, pasi ka shkuar në atë lokacion personi i sëmurë me autoambulancë është dërguar në spitalin rajonal në Pejë dhe rreth orës 21:00, nga ekipi mjekësor është konfirmuar vdekja e tij. Me vendim të Prokurorit të shtetit trupi i viktimës është dërguar në IML për obduksion”, tha Rugova.

Ndërsa, vdekja është konsideruar si e dyshimtë dhe trupi i viktimës është dërguar për obduksion. /Reporteri.net/.