Kryetari i Shoqatës së Gastronomëve, Petrit Kllokoqi ka thënë se edhe në ambientet e Qeverisë së Kosovës në objektin e ish-Rilindjes, ka qenë e hapur byfeja e nëpunësve.

Objekti, në të cilin janë të vendosura disa dikastere ministrore, sipas burimeve të kryetarit të Shoqatës së Gastronomëve, e ka pasur të hapur byfenë e punonjësve sikurse është dëshmuar të ketë ndodhur në Ministrinë e Infrastrukturës dhe Mjedisit (MIA).

“Qeveria e Kosovës ka 15 Ministri gjithsej. E njëra nga to është edhe Ministria e Mjedisit dhe Infrastruktures, prej nga ka rrjedh edhe video e publikuar sot”, ka thënë Kllokoqi.

Në një reagim ndaj zëdhënësit të qeverisë, Përparim Kryeziut, i cili tentoi ta demantonte videon e cila shfaqte dhjetëra punonjës të MIA-së të mbledhur në byfenë e Ministrisë, Kllokoqi ka vënë në pah se video e publikuar i dhe fotot e publikuara nga zëdhënësi i ekzekutivit, nuk shfaqin të njëjtën hapësirë por dy objekte të ndryshme.

“Në videon e publikuar nga burimet tona dhe në fotot e publikuara si arsyetim nga disa, shihet qartë se shkallet nuk janë të njejta, as pllakat, e as karrikat. Nga burimet tona edhe Byfe-ja në objektin e Rilindjes ka qenë e hapur. Ndoshta në Kryeministri paska qenë e mbyllur!”, ka thënë ai.