Komuna e Prizrenit ka filluar me parapërgatitjet për festat e fundvitit. Kjo komunë ka planifikuar të shpenzojë rreth 40 mijë euro për dekorimin e qytetit për festa, shkruan Gazeta Online Reporteri.net.

Në njoftimin për kontratë të publikuar në e-prokurim, janë treguar edhe pjesët që do të dekorohen.

“Do tè dekorimi i qytetit të Prizrenit në: Sheshi i Shatërvanit, Rruga Adem Jashari, Parku te Qafa e Kishës, Shtrati i Lumbardhit, Shtëpia e Bardhë dhe Ura e Arastës”, thuhet në njoftim.

Kohëzgjatja e kësaj kontrate do të jetë 20 ditë nga data e dhënies.

Kompanitë e interesuara për këtë tender kanë afat t’i dorëzojnë ofertat deri më 3 nëntor, në orën 13:30.

“Çdo palë e interesuar mund të bëjë ankesë pranë Autoritetit Kontraktues, në bazë të nenit 108/A të Ligjit Nr. 04/L-042 për Prokurimin Publik të Republikës se Kosovës, i ndryshuar dhe plotësuar me ligjin Nr. 04/L-237, ligjin Nr. 05/L-068 dhe ligjin Nr. 05/L-092ne adresën e specifikuar ne Nenin I te këtij Njoftimi për kontratë”, thuhet në njoftim./Reporteri.net