Konjufca: Kuvendi të miratojë sa më shumë ligje në funksion të interesit qytetar

Kryetari i Kuvendit të Kosovës, Glauk Konjufca priti sot në takim ambasadoren e Holandës në Prishtinë, Carin Lobbezoo, me të cilën bisedoi për situatën politike në vend dhe situatën me pandeminë.


Ambasadorja Lobbezoo përgëzoi Konjufca për detyrën e re dhe shfaqi shpresën se procesi zgjedhor do të përmbyllet me zgjedhjen e presidentit të ri të vendit.

Të dy palët thanë se arritja e kontingjentit të parë të vaksinave antiCOVID-19 është lajm i mirë për Kosovën dhe shfaqën shpresën që sasi të tjera të vaksinave do të sillen së shpejti në Kosovë, në mënyrë që të fillojë edhe vaksinimi i popullsisë.

Kryetari Konjufca ka thënë se në mandatin e tij synon ta dinamizojë punën në Kuvend, duke pas parasysh raportin e forcave në organin legjislativ.

Në këtë kontekst, ai ka thënë se mbetet përkushtim i tij që Kuvendi të miratojë sa më shumë ligje, të cilat do të jenë në funksion të interesit qytetar.