Konjufca uron Pashkët: Janë festë e paqes, tolerancës dhe respektit të ndërsjellë

Ushtruesi i detyrës së presidentit, Glauk Konjufca, ka uruar besimtarët e krishterë me rastin e Festës së Pashkëve.


Ai ka thënë se sot për festën e Pashkëve nuk do të mund t`i vizitojë të afërmit e miqtë për urime, por do të mund t`u dërgojë urimet më të sinqerta për ditë më të mira.

Në vijim, gjeni urimin e plotë të tij:

Kremtet në traditën shqiptare festohen në harmoni ndërvëllazërore.

Sot për festën e Pashkëve s`do të mund t`i vizitojmë të afërmit e miqtë për urime, por do të mund t`u dërgojmë urimet më të sinqerta për ditë më të mira.

Në këtë kohë kur virusi Covid-19 ka pllakosur botën, jemi të shtrënguar të urojmë njëri-tjetrin nga distanca.

Pashkët janë festë e paqes dhe ringjalljes, zemërgjerësisë, tolerancës dhe respektit të ndërsjellë.

Në këtë ditë, uroj të gjithë bashkëkombësit katolikë. Kjo festë sjelltë në shtëpitë tuaja mirësi e begati!

Gëzuar për shumë mote Pashkët!