Ministrja e Administratës dhe Pushtetit Lokal, Emilija Rexhepi, dje bëri të ditur se do t’iu lejohet shfrytëzimi i veturave zyrtare edhe pas orarit të punës edhe disa këshilltarëve të saj.

Më saktë në këtë vendim, thuhet se veturat do të përdoren edhe jashtë orarit të punës, deri në një afat të pacaktuar.

Për këtë çështje sot është pyetur në konferencë për media kryeministri Albin Kurti. Por kreu i ekzekutivit kosovar fare nuk ka qenë i njoftuar me vendimin që ka marrë ministrja e tij.

“Sa i përket veturave do ta hetoj këtë gjë, nuk e di se çfarë ka ndodhur, por ne jemi qeveri e shkurtimeve dhe kjo është parë me përgjysmimin e pagave dhe duhet ta kemi parasysh që këshilltarët që i kemi ne kanë pagë nën 600 euro”, ka deklaruar Kurti sot në konferencë.

Kujtojmë se Kurti ka premtuar se Qeveria që udhëheq ai do të jetë e kursimit të parasë publike, dhe e zhvillimit ekonomik dhe punësimit. /Reporteri.net/.