Kryesia e dorëhequr e LDK-së mblidhet në ora 16:30

Kryesia e dorëhequr e Lidhjes Demokratike të Kosovës do të mblidhet sot në orën 16:30.


Këtë e kanë konfirmuar për Gazetën Online “Reporteri.net” Safet Kamberi, anëtar në dorëheqje i Kryesisë së LDK-së.

“Po në ora 16:30 na kanë dërguar ftesë për mbledhje. Nuk e di rendin e ditës”, ka thënë shkurt Kamberi për Reporteri.net.

Edhe Sokol Haliti, poashtu anëtar i dorëhequr i Kryesisë së LDK-së ka konfirmuar mbledhjen që pritet të mbahet sot.

“Na ka ardhë ftesa për në ora 16:30 se kemi mbledhje, por asgjë tjetër, pra nuk e di rendin e ditës”, ka thënë Haliti për Reporteri.net.

Por sipas të gjitha gjasave në këtë mbledhje, pritet të diskutohet edhe për datën e mundshme për mbajtjen e Kuvendit zgjedhor, ku do të zgjidhej kryetari i ri.

Kreu i LDK-së, Isa Mustafa dje deklaroi për mediat se deri në fund të kësaj jave do të caktohet data për mbajtjen e Kuvendit të LDK-së ku edhe do të zgjidhet kryetari i ri i partisë.

“Deri në fund të javës do të caktohet data e mbajtjes së Kuvendit për zgjedhjen e Kryetarit të ri të LDK-së”, ka thënë Mustafa.

Kujtojmë se Mustafa dha dorëheqje pas rezultatit zhgënjyes të LDK-së, ku kjo parti doli e treta, duke shënuar rezultatin më të dobët që prej themelimit. /Reporteri.net/.