Ushtruesja e detyrës, Vjosa Osmani, e cila në zgjedhjet e reja do të garojë me Iniciativën e saj sipas të gjitha gjasave në listën e Vetëvendosjes nuk ka mund të tregojë se ku do t’i marrin paratë për të bërë fushatë.

Ajo ka thënë se fushata në këto zgjedhje do të jetë më ndryshe për shkak të pandemisë dhe se nuk do të bëhen harxhime duke organizuar tubime të mëdha.

“Jemi në proces të analizave ligjore, kam angazhuar një avokat dhe një ekspert për të marrë një analizë përfundimtare. Fondet më të mëdha shkojnë në organizim të tubimeve.

Sivjet s’ka tubime të tilla, fushata elektorale do të jetë derë me derë, do të shohim qytetarët kujt do t’ia hapin derën e kujt do t’ia mbyllin”, ka deklaruar Osmani në një intervistë për kallxo.com, shkruan Reporteri.net.

Ajo ka thënë se secili anëtar i Iniciativës së saj duhet të bëjë fushatë modeste.

“Gjithçka do të bëhet në përputhje me ligjin, por duhet të jemi secili prej nesh modest në shpenzimet që i bëjmë në fushatë”, tha Osmani. /Reporteri.net/.