Me 61 vota për dhe 1 abstenim është votuar Qeveria e re e Kosovës e udhëhequr nga Ramush Haradinaj. Ky ishte lajmi që u dha me 9 Shtator të vitit 2017, tre muaj pasi ishin mbajtur zgjedhjet nacionale, 11 Qershor.

Mungesa e numrave për ta formuar qeverinë, negociatat e zgjatura me AKR-në, kishin bërë që tre muaj të vonohej qeveria e re në krye me Haradinajn. Ai vinte si kryeministër nga një koalicion parazgjehdor i madh, PDK-AAK-NISMA me 33.74 për qind e përkthyer në 39 deputetë.

Tre muajshin tashmë e ka shkelur edhe fituesi i zgjedhjeve të fundit, atyre të 6 tetorit 2019, Albin Kurti, shkruan Reporteri.

Ai nuk po e sheh si të ngutshme krijimin e qeverisë së re. Ndonëse po i kërkohet t’ia fillojë krijimit të qeverisë, ai thotë se është e rëndësishme një marrëveshje e mirë me LDK-në se sa ngutia për ta bërë qeverinë.

Por, raportet me LDK-në janë përkeqësuar pasi ata nuk po bijnë dakord për pozita institucionale tash e tre muaj. Aq më tepër tash kur VV-ja ndonëse ia kishte premtuar Kryetarin e Kuvendit, LDK-së, e ndau për vete. VV ka 29 deputetë e LDK 28.

Prej javës së kaluar, kur u mbajten 3 takime radhazi, krerët e dy partive, Albin Kurti dhe Isa Mustafa nuk janë takuar më dhe as nuk kanë planifkuar një gjë të tillë./Reporteri.net/