Kryeministri i vendit, Albin Kurti sot ka udhëtuar drejt Greqisë për të marrë pjesë në darkën e ftuar nga kryeministri grek, Kyriakos Mitsotakis.

Kjo darkë po mbahet për 20 vjetorin e Samitit të Selanikut, e ku të ftuar janë liderët e Ballkanit Perëndimor.

Një gjë e tillë është konfirmuar për Gazetën Online Reporteri.net nga zëdhënësi i Qeverisë, Përparim Kryeziu.

“Kryeministri Kurti ka udhëtuar për në Athinë ku do të marrë pjesë në darkën e ftuar nga kryeministri grek, Mitsotakis me liderët e Ballkanit Perëndimor, që po mbahet në 20 vjetorin e Samitit të Selanikut.
Gjatë qëndrimit atje do të zhvillojë edhe disa takime për të cilat do të njoftoheni me kohë”, ka thënë Kryeziu për Reporteri.net.

Përpos Kurtit, nga liderët rajonalë do të marr pjesë edhe kryeministri i Maqedonisë së Veriut Dimitar Kovaçevski, presidenti malazez, Jakov Milatoviç, kryetarja e Këshillit të Ministrave të Bosnjës dhe Hercegovinës, Borjana Kristo si dhe presidenti serb, ish-ministri i Millosheviqit, Aleksandër Vuçiq.

Në darkën joformale do të marrin pjesë edhe liderët e vendeve që janë anëtare të BE-së si kryeministri i Bullgarisë, Nikolai Denkov, i Kroacisë, Andrej Plenkoviq, dhe i Rumanisë Ion-Marsel Ciolacu./Reporteri.net/