Kryeministri i Kosovës, Albin Kurti sapo ka reaguar për deklaratën e ambasadorit Richard Grenell se Kurti e kishte shikuar në sy dhe i kishte thënë se do ta heq taksën.

Kurti tha se ka shikuar në sy Grenellin dhe i ka premtuar heqjen e taksës. Por, tha Kurti, asnjëherë nuk i kam thënë që do ta heqim tarifën 100% pa reciprocitet.

“Me ambasadorin amerikan në Berlin, z. Richard Grenell, jam takuar dy herë. Takimi i parë ishte më 9 tetor 2019, në ora 13:45, në Ambasadën e ShBA-ve në Prishtinë. Takimi i dytë ishte më 23 janar 2020, në ora 10:30, në selinë qendrore të LVV. Në takimin e parë me mua ishte z. Glauk Konjufca. Në takimin e dytë me mua ishin z. Glauk Konjufca dhe znj. Fitore Pacolli-Dalipi. Të dy herët, z. Grenell e kam shikuar në sy. Por, asnjëherë nuk i kam thënë që do ta heqim tarifën 100% pa reciprocitet. Është për t’u përshëndetur dhe inkurajues deklarimi i qartë i sotëm i Ambasadorit Grenell kundër planeve për shkëmbim territorial”, ka shkruar Kurti në facebook.

Ndryshe, Emisari i Presidentit Amerikan në bisedimet Kosovë–Serbi Richard Grenell, në një intervistë për T7 ka zbuluar detaje të bisedave me Kryeministrin në dorëheqje Albin Kurtin duke thënë se ai i kishte premtuar heqje të taksës.

“Ai më shikoi në sy dhe tha se ata do ta largojnë taksën” ka thënë Grenell. Sipas tij, është qëndrim i Shtetet e Bashkuara se “taksa prej 100 për qind që është zbatuar para z.Kurti ka qenë duke i dëmtuar ekonominë dhe popullin e Kosovës më së shumti”, ka deklaruar amerikani Grenell.