Ministri i Infrastrukturës dhe Transportit, Pal Lekaj, ka vizituar Agjencinë e Shërbimeve të Navigacionit Ajror, të cilës agjenci u ka premtuar se do të trajtohet me ligj.

Për këtë, Lekaj ka takuar edhe drejtorin e ASHNA, Bahri Nuredinin, nga i cili thotë se u njoftua për rritje të përformancës për 12%, shkruan Reporteri.net.

Ndërkohë, Lekaj ka potencuar se këto sukese dhe procesin e marrjes në kontroll nga autoritetet kosovare, do ta dëmtonte ndonjë shenjë proteste nga kontrollorët ajrorë, nga të cilët ka kërkuar maturi.

Ky është publikimi i plotë i ministrit Lekaj:

Agjencia e Shërbimeve të Navigacionit Ajror, ka rëndësinë e saj të veçantë dhe si e tillë do të trajtohet edhe me ligj. Këtë premtim e përsërita edhe njëherë gjatë vizitës që i bëra ASHNA-s. Po punojmë sipas kompetencave, bashkë me dikasteret tjera, që kontrollorët ajrorë të kenë trajtimin meritor.

Nga drejtori i këtij institucioni, Bahri Nuredini, u informova për ngritjen e performancës në dhënie të shërbimeve për mbi 12%, nga periudha e njëjtë e vitit paraprak.

Këtë sukses dhe mbarë procesin e marrjes në kontroll nga autoritet tona, të hapësirës së ulët ajrore, do ta dëmtonte çdo shenjë proteste nga kontrollorët ajrorë. Prandaj pres profesionalizëm dhe maturi karshi procesit.