Lirohet polici Vesel Veseli, i cili dyshohet se dhunoi 16 vjeçaren

Janë liruar nga paraburgimi polici dhe profesori nga Drenasi, të dyshuar se kanë abuzuar seksualisht me një të mitur, i njohur tashmë në Kosovë si “Rasti Drenasi”.


Ndaj tyre tash rëndon masa e arrestit shtëpiak.

Konfirmimin për ndryshimin e masës për ta e ka dhënë për Reporteri.net, Imer Beka, kryeprokuror i Prokurorisë Themelore në Prishtinë.

Ai ka thënë se ata nuk janë liruar por masa e paraburgimit është zëvendësuar me masën e arrestit shtëpiak.

Kujtojmë se Veseli ishte arrestuar para tre muajsh pasi dyshohej se kishte shfrytëzuar pozitën e tij duke abuzuar me vajzën deri kur ajo kishte mbetur shtatzëne, e më pas e kishte detyruar të abortonte.

Çfarë kishte rrëfyer vajza nga Drenasi në shkurt të këtij viti…

Kujtojmë se vajza nga Drenasi në shkurt të këtij viti kishte rrëfyer gjithë historinë e saj të trishtë.

“Jam shumë e shqetësuar për shkak të rastit që ka ndodhur. Profesori i Informatikës filloi të më ngacmojë në klasën e 10-të, pastaj më dhunoi edhe seksualisht. Ka filluar të më shkruajë në rrjetet sociale, me të kam pranuar të dalë pas një jave – në veturë e kemi pasë marrëdhënien e parë seksuale. Pastaj më ka lënë shtatzëne profesori. Për një vit kam qenë e dhunume nga ai.
Ai më ka mashtruar. Ka thënë se rrugët tona do të hapen kur unë ta përfundojë shkollën. Pastaj kam marrë vendim dhe më 14 shtator 2016 e kam paraqitur rastin në polici. Kam qenë 16 vjeçe”, kishte deklaruar ajo.

Vajza tregon pse më pas e ka tërhequr padinë për profesorin.

“Në janar 2017 e kam heqë deklaratën. Kur profesori më premtoi se do të më marrë, nëse nuk do ta hiqja më tha se do të më vrasë”, kishte thënë ajo për Insajderin.

Tutje ajo tregon se si rrodhi ngjarja me hetuesin Vesel Veseli.

“Aty ka qenë edhe Vesel Veseli kur e kam dhënë deklaratën. Atë natë me një shok më ka sjellë në shtëpi dhe më tha ‘nuk paska pasë faj profesori. Ma kërkoi numrin, më tha nëse nuk ma jep e gjej për dy minuta. Më pas filloi duke më shkruar, duke më shantazhuar më ka bindë edhe me dalë me të. Më tha nëse nuk del me mu – kur të them unë – do të mbysë. Pas dy ose tre ditësh jam imponuar për të dalë për shkak të frikës, nuk doja me pasë probleme familja ime. E kam majtë rastin brenda vetes meqë e kam një vëlla hasret dhe nuk kam dashtë me pasë ai probleme. Marrëdhënia me policin ka zgjatë 6-7 muaj. Pasi kam mbetë shtatzënë më ka detyruar ta abortojë fëmijën pa dëshirën time. Më ka thënë nëse nuk e heq fëmijën ke me ra në konop. Kam abortuar më 15 janar – kur i kisha 18 vjet e kam kryer abortin. Para moshës 18 vjeçare kam qenë me Veselin, kam qenë e mitur”, kishe deklaruar ajo.

E reja nga Drenasi kërkon që profesori, polici, por edhe mjeku të marrin dënimin maksimal.

“Jam e gatshme t’i shkojë rastit deri në fund”.
/Reporteri.net/.