Autor: Besfort Veseli

Krahas shpenzimeve të Kryeministrit Kurti me ekipën e tij, Gazeta Online “Reporteri.net” nëpërmjet kërkesës për qasje në dokumente zyrtare ka siguruar qasje edhe në harxhimet e zëvendës kryeministrave Besnik Bislimi e Emilija Rexhepi.

Në dokumentet e përcjellura nga Kabineti i Kurtit, në 100 ditët e para si zëvendës kryeministër për Integrim Evropian, Zhvillim dhe Dialog ka harxhuar gjithsej 1 mijë e 684 euro.

Numri dy i Qeverisë Kurti për akomodim e bileta për udhëtime jashtë vendit harxhoi plot 667 euro.

Ndërsa për dreka zyrtare, zëvendësi i Kurtit shpenzoi 545.50 euro e për derivate saktësisht 116 euro.

Nga buxheti i Kosovës, Bislimi mori 355 euro meditje gjatë periudhës 22 mars – 30 qershor.

Edhe zëvendëskryeministrja tjetër që vjen nga komuniteti boshnjak, Rexhepi shpenzoi gjithsej 2 mijë e 103 euro, ku 180 euro shkuan për mëditje dhe 1 mijë e 292 euro për dreka zyrtare.

Zëvendëskryeministrja për Çështje të Pakicave dhe Drejtat e Njeriut, harxhoi 631 euro për derivate.

Por, Rexhepi nuk ka shpenzuar asnjë cent të financave publike për akomodim dhe bileta.
Këshilltarët e saj shpenzuan vetëm për derivate 445 euro.

Gjithsej Kabineti i Kryeministrit Kurti dhe të zëvendëskryeministrave të Qeverisë shpenzuan për 100 ditë plotë 11 mijë e 802 euro e 25 cent.

Më parë, Reporteri.net ka shkruar rreth shpenzimeve të Kurtit e të stafit të tij, shuma e të cilave është e vogël në krahasim me kryeministrat paraprak.

Ajo çfarë ra në sy në harxhimet 100 ditore të kryeministrit Kurti ishte mos marrja e medijteve ndonëse ai udhëtoi disa herë jashtë vendit.

Ndërkaq, shifrat e dërguara në adresë të Reporteri.net nga MPJD janë llogaritur gabim.