Kryetari i Partisë Demokratikë të Kosovës, Memli Krasniqi ka porositur Qeverinë e Kosovës që tek çështjet e energjisë nuk duhet të bëhet asnjë veprim pa u koordinuar me Shtetet e Bashkuara të Amerikës.

Krasniqi këtë deklaratë e ka bërë në emisionin “Politiko” në Kanal 10 teksa po diskutohej për një vjetorin e Marrëveshjes së Washingtonit. Ai ka thënë se PDK konsideron që kjo marrëveshje është obligative për Kosovën.

“Energjia nuk është vetëm çështje ekonomike, është çështje edhe e sigurisë. Tek çështja e energjisë dhe gazit asnjë veprim nuk duhet të bëhet pa qenë në koordinim të plotë me SHBA-në, pa qenë në koordinim 100% me ta. Kjo është Alfa dhe Omega. Ne po flasim për cështje të sigurisë kombëtare, qoftë SHBA, Kina, Irani çështjen e energjisë e kanë çështje të sigurisë kombëtare”, tha Krasniqi, shkruan Reporteri.net.

Asnjë veprim sipas tij jo vetëm për gazsjellës por as për qymyr e energji të ripërtëritshme nuk duhet të ndodhë pa këshillat e SHBA-së.

Krasniqi ka thënë se qytetarët e Kosovës e meritojnë që kryeministri të jetë më i sinqertë me të.