Kryesia e Kuvendit të Kosovës pritet që sot të vendos nëse do të mbahet seanca për mocionin e mosbesimit të qeverisë Kurti, apo jo. Por, mikrobiologu Lul Raka, për dallim nga IKSHPK, thotë se kjo seancë nuk duhet të mbahet.

Kryesia e Kuvendit të Kosovës ka marrë një përgjigje nga Instituti Kombëtar i Shëndetësisë Publike lidhur me atë nëse guxon të mbahet seanca për mocionin e mosbesimit të qeverisë Kurti, shkaku i rrezikut nga përhapja e coronavirusit.

Në përgjigjen e këtij instituti nuk ndalohet mbajtja e kësaj seance. Por ndryshe mendon mikrobiologu Lul Raka, i cili përmes një reagimi në Twitter, thotë se edhe pse ai nuk është pyetur për këtë, mendimi i tij ëshët ‘Jo. Pikë’.

“Në Task-forcën e IKSHPK që ju ka pergjigjur Kuvendit nuk paska qenë asnjë mikrobiolog që punon në këtë shtëpi. Nuk po flas hiç për vete, por për kolegët e mi që punojnë natë e ditë në laborator e terren. Nejse. Mendimi im per mbledhje ( pa doreza, normalisht): është JO. Pikë”, ka shkruar Raka.