Gazetari Milaim Zeka ka folur rreth çështjes së zgjedhjes së Vjosa Osmanit presidente.

Zeka në DTP te Fidani në T7 tha se ka gjasa që edhe vetë kryetari i LDK-së, Lumir Abdixhiku të votojë kundër Vjosa Osmanit.

“Përderisa votimi është i fshehtë nuk mundet askush me e ditë e me e imponu votën. Gjasat janë që edhe Lumir Abdixhiku mundet me votu kundër Vjosa Osmanit. Po bëhet luftë me i prish matematikat e Albin Kurtit. Matematikat e Kurtit janë me e bë Vjosa Osmanin presidente”, tha Zeka.

Ai shtoi se nëse Albin Kurti e çon vendin në zgjedhje dhe nëse opozita e bind elektoratin se Kurti don vetëm kaos, ai mund të pësoj disfatë të jashtëzakonshme.

Abdixhiku pas mbledhjes të LDK-së kishte deklaruar se kryesia e partisë ka vendosur me shumicë absolute që të marrin pjesë në votim për presidentin.

“Pas një diskutimi të hapur, të gjithë bashkarisht kemi marrë vendim që LDK nuk do të bëjë obstruksione në zgjedhjen e presidenti të vendit, dhe LDK të marrë pjesë në votimin për presidentin, ky është vendim i Kryesisë i votuar me shumicë absolute. Pres që secili deputet të respektojë vendimin e shumicës dhe pres që nga secili deputet të sillen si institucionalist dhe ta kapërcejnë veten dhe çfarëdo hidhërimi që mund të kenë”, ka thënë Abdixhiku.