Ministri i Drejtësisë, Selim Selimi sot në Belgjikë është takuar me një grup bashkatdhetarësh, shkruan Reporteri.net.

Ministri Selimi ka thënë se bashkatdhetarët tanë kanë qenë zë i fuqishëm i Kosovës në momentet më vendimtare, çdo herë forcë kyçe e ekonomisë sonë dhe referencë e përhershme e atdhedashurisë.

“Ndjenjë e veçantë të isha sonte në mesin e disa prej njerëzve të suksesshëm të diasporës sonë në Belgjikë, me të cilët vlerësuam lartë zhvillimet pozitive të fuqizimit të shqiptarëve në tërë rajonin tonë, maturimin politik dhe avancimin e demokracisë në Kosovë, si dhe pata kënaqësinë të dëgjoj nga secili prej tyre të arriturat mbresëlënëse”, ka shkruar ai në Facebook pas këtij takimi.

Ai ka shtuar se investimet e diasporës sonë, me potencial të madh, janë me interes të jashtëzakonshëm për Kosovën.

“Për këtë i njoftova për përpjekjet e vazhdueshme në luftën kundër korrupsionit, si element thelbësor për zhvillim ekonomik, si dhe nismën për avancimin e ligjit për funksionalizimin e Gjykatës Komerciale dhe panelit të veçantë në kuadër të kësaj gjykate, që do të shërbejnë si garanci për investim”, ka shtuar Selimi.

https://www.facebook.com/selimselimiks/posts/144897647244688