Bordi i Asociacionit të Komunave të Kosovës i ka kërkuar Ministrisë së Financave, Punës dhe Transfereve  që sa më shpejt të bëjë bartjen e mjeteve financiare të Komunave nga rritja e të hyrave vetanake nga viti 2023.

“Këto mjete janë të Komunave dhe duket shumë absurd që mjetet e Komunave të bllokohen nga niveli qendror”, thuhej në reagimin e BAKK-së.

“Kemi të bëjmë më mosbartjen e rritjes së të hyrave vetanake të vitit 2023, e që këto të hyra kapin shifrën e milionave euro. Komunat që kanë tejkaluar planifikimin e të hyrave vetanake për vitin 2023 kanë aprovuar këtë rritje buxhetore në Kuvendet e Komunave përkatëse mirëpo, MFPT ende nuk i ka bartur këto të hyra dhe i zvarrit pa asnjë arsye”, thuhej më tej në njoftim.

“A thua përse ndodhë një veprim I tillë ndaj Komunave? Duhet ditur se MFPT e ka obligim ligjor që këto mjete t’i bartë te komunat sepse janë të hyra vetjake të komunave. Duke marrë parasysh që këto mjete nga rritja e të hyrave vetanake të komunave për vitin 2023 janë të destinuara për projekte kapitale, me këtë veprim niveli qendror i fut në rreziqe komunat që të mos mund të procedojnë në publikimin e projekteve për të cilat janë destinuar”.

Sipas Asociacionit të Komunave të Kosovës, komunat edhe pse i kanë të destinuara këto mjete për investime kapitale, pra për përmirësimin e jetës së qytetarëve, kjo nuk mund të ndodhë për shkak pengesave të shkaktuara nga niveli qendror. Komunat janë në pritje të bartjes së të hyrave nga rritja e realizuar nga vetë komunat.

“I bëjmë ftesë publike Ministrit të ndërmarrë veprimet konkrete ligjore për realizimin e të drejtës së Komunave në të kundërtën po neglizhohet në dëm të Komunave e rrjedhimisht në dëm të mosrealizimit të projekteve kapitale në interes të qytetarëve”, thuhej në njoftim.