Instituti Kombëtar i Shëndetësisë Publike të Kosovës ka njoftuar për 7 rastet e reja me Coronavirus të konfirmuara sot në Kosovë. Lajmi i mirë është se për të katrën ditë me radhë, në Kosovë, numri i të shëruarve është shumë më i madh sesa ai i të infektuarve.

Vetëm të enjten në Kosovë janë shëruar 22 persona që ishin pozitiv me Covid-19 duke e çuar në 271 numrin e të shëruarve në Kosovë nga pandemia, shkruan Reporteri.net.

Ndërsa numri i të infektuarve, ditën e sotme është rritur për vetëm 7 raste të reja.

Rastet e reja janë nga tre komuna të ndryshme, ajo e Prizrenit – 5 raste, dhe nga një rast në komunat e Vitisë dhe Mitrovicë e Jugut.

Në Mitrovicën e Jugut rasti i sotëm i konfirmuar është rasti i parë sonte, shkruan Reporteri.net.

Ky është njoftimi:

NJËZET E DY TË SHËRUAR DHE SHTATË RASTE ME COVID-19!

Sot më 30 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 243 mostra të marra nga Klinika Infektive, gjurmimi i kontakteve të rasteve në terren si dhe nga karantina në Qendrën studentore.

Me SARS-CoV-2, janë diagnostikuar gjithsej shtatë (7) raste.

Rastet pozitive janë raste kontakti nga: Komuna e Prizrenit: 5 raste (sipas vendbanimit: 5 raste Prizren) dhe nga 1 rast vendbanimet: Ramjan-Viti dhe Mitrovicë e Jugut.

Sot më 30 prill 2020, janë shëruar edhe njëzet e dy (22) pacientë, bazuar në rekomandimet e OBSH-së ku dy mostra rezultojnë negative me së paku një ditë distancë kohore. Numri i përgjithshëm i të shëruarve deri më sot është gjithsej dyqind e shtatëdhjetë e një (271) raste.

Nga data 08 shkurt deri më 30 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 7.423 mostra të dyshimta në virusin SARS-CoV-2 dhe prej tyre pozitive rezultojnë gjithsej tetëqind e gjashtë (806) raste, me gjithsej njëzet e dy (22) raste të vdekjes të cilët kanë pasur sëmundje të tjera shoqëruese.

Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke i obliguar për vetëizolim dhe të kërkojnë ndihmë mjekësore nëse kanë simptome.

Në nivel global, nga data 31 dhjetor 2019 deri më 30 prill 2020 sipas Ëorldometers, janë raportuar gjithsej 3.287.347 raste të COVID-19 dhe 232.784 raste të vdekjes.

QYTETARË TË NDERUAR!
JU LUTEMI TË RESPEKTONI MASAT E SHPALLURA TË PARANDALIMIT NGA INSTITUTI KOMBËTAR DHE MINISTRIA E SHËNDETËSISË!
RUAJENI SHËNDETIN TUAJ! PAKUJDESIA KUSHTON ME JETË!
QËNDRONI NË SHTËPI, KJO UA SHPËTON JETËN!
MBANI DISTANCË FIZIKE PËR SË PAKU 2 METRA!
NA NDIHMONI PAK QË TË JU NDIHMOJMË SHUMË!
Ju faleminderit për mirëkuptim!