Sulmi që iu bë gruas rome sot në mes të qytetit të Ferizajt, tronditi opinionin për të dytë herë. 

Janë siguruar pamje të momentit kur gruaja rome goditet në kokë nga një person në qytetin e Ferizajt.

Ndërkohë policia deklaroi se e sulmuara është duke u mbajtur në stacionin policor, dhe se nuk ka shenja të lëndimeve.

Video e sulmit:

Pas këtij sulmi kanë ardhur reagime edhe nga liderë të institucioneve në Kosovë, shoqëria civile dhe deputetë të Kuvendit të Kosovës, duke e quajtur aktin si të shëmtuar.

Në reagimin e Rrjetit të Organizatave të Grave Rome, Ashkali dhe Egjiptase të Kosovës (RROGRAEK) thuhet se janë tejet të shqetësuar lidhur me rastin e gruas nga komuniteti rom, e cila sot u sulmua sërish, në qytetin e Ferizajt.

RROGRAEK konsideron se kjo që po ndodh me gruan rome, është tejet serioze, pasi që ajo u sulmua, përkundër asaj që shteti një ditë më parë, e mori atë nën mbrojtje.

“Ku mund të drejtohemi dhe tani më nuk e dimë kush do të kujdeset për të. Jeta e saj është në rrezik. Kërkojmë dhe bëjmë apel tek gjitha instancat e larta në vend, që të merren seriozisht me këtë rast”, thuhet në reagim.

Sipas RROGRAEK, kjo sjellje brutale ndaj një gruaje, e cila vjen nga komuniteti rom, e e cila është dyfish e diskriminuar, së pari si grua dhe më pastaj si komunitet pakicë, duhet ta marrë dënimin e merituar dhe të mos mbetet vetëm në suaza të deklaratave.

“Përderisa Policia e Kosovës, ka deklaruar se gruaja e cila ishte riatdhesuar nga Belgjika në Kosovë në vitin 2011, nuk dyshohet për ndonjë aktivitet kriminal, por e cila u sulmua pasi që grupe të ndryshme online, kanë alarmuar rrejshëm për rrezikun që pretendohej se ajo paraqiste, nuk duhet të mbetet me kaq. Por se rasti duhet të qartësohet deri në fund dhe akteret e këtij rasti, të cilët ushtruan dhunë ndaj një gruaja rome, të marrin dënimin e merituar”, thuhet tutje në reagim.

RROGRAEK fton institucionet përkatëse që të marrin rastin parasysh dhe të marrin masa disiplinore
ndaj sulmuesve, duke të trajtuar rastin deri në fund.

RROGRAEK po ashtu u bënë thirrje institucioneve arsimore në Kosovë, që të kenë kujdes me fëmijët, tek të cilët të mos ketë nxitje të urrejtjes ndaj qytetarëve të komuniteteve tjera dhe të ketë sulme në baza racore, si në rastin me gruan e komunitetit rom.