Nënkryetarja e Kuvendit nga radhët e Lëvizjes Vetëvendosje, Arbërie Nagavci  ka folur për emërimet e fundit në borde të ndërmarrjeve publike, ku ndër të tjerë u vendosën edhe njerëz të Vetëvendosjes.

Nagavci ka akuzuar se po bëhet propagandë e vazhdueshme me qëllim për ta baltosur Lëvizjen Vetëvendosje.

Sipas Nagavcit  nevojitet reagim i shpejtë, auditim i brendshëm në ndërmarrje nga bordet e përkohshme, vlerësim i performancës, ndërprerje e kontratave të dëmshme dhe adresim i secilës shkelje.

“Kosova, fatkeqësisht është një nga vendet më të izoluara, korruptuar, vjedhura e keqpërdorurura. E kjo nuk ka ndodhur as rastësisht e as vetvetiu. Andaj nevojitet reagim i shpejtë, auditim i brendshëm në ndërmarrje nga bordet e përkohshme, vlerësim i performancës, ndërprerje e kontratave të dëmshme, adresim i secilës shkelje”, ka shkruar Nagavci.

Reagimi i plotë:

Në Kosovë ka ndodhur ndryshimi. Kthim prapa s’ka.

Standarde të reja janë vendosur tashmë. Qytetarët janë vetëdijësuar dhe reagimi është i shpejt e shumë shpesh masiv, gjithnjë e më shumë aktivizëm politik e përfshirje.

Në LV! jemi të vetëdijshëm për pritshmëritë e qytetarëve ndaj nesh, kjo vetëm se na bën më të vëmendshëm e të kujdesshëm. Na bën të përgjegjshëm që nga ne pritet të jemi në nivelin më të lartë të detyrës, efikas, korrekt e profesionist. Sepse përkrahja është beteja që ne duhet ta fitojmë, beteja për të qenë në nivelin më të lartë të etikës, profesionalizmit, legjimitetit e vlerave morale.