Sekretari i përgjithshëm i NATO-s, Jens Stoltenberg, ka deklaruar se mirëpret iniciativat për vazhdimin e dialogut Kosovë – Serbi, si mënyrë e vetme për zgjidhjen e problemit midis dy vendeve.

“Unë e mirëpres faktin që Beogradi dhe Prishtina po diskutojnë, sepse mënyra e vetme për të zgjidhur sfidat në rajon dhe mosmarrëveshjet për Kosovën është përmes bisedimeve për një zgjidhje politike”, deklaroi Stoltenbergu.

Kurse kreu i zyrës së NATO-s në Beograd, Tomazo Vitale, tha se Aleanca mbështet dialogun e ndërmjetësuar nga Bashkimi Evropian, duke potencuar se ushtarët e KFOR-it në Kosovë veprojnë sipas një mandati të qartë të OKB-së dhe Rezolutës 1244, e cila siç theksoi ai garanton lirinë e lëvizjes dhe sigurinë në territorin e tërë Kosovës.

“NATO-ja ishte dhe do të jetë plotësisht e angazhuar për të realizuar detyrat e saj sipas mandatit të qartë të KB dhe Rezolutës 1244”, tha Vitale në diskutimin online “Forcimi i lidhjeve midis Serbisë dhe NATO-s”, të organizuar nga Këshilli Atlantik i Serbisë.

Ndryshe, më 27 qershor, Kosova dhe Serbia do të rinisin bisedimet në Shtëpinë e Bardhë me ftesë të komisarit amerikan për dialogun, Richard Grenell.