Spiunes ruse i ndalohet hyrja në Kosovë, Sveçla: Synon destabilizimin e vendit

Në pikë kalimin kufitar në veri të vendit është ndaluar sot Daria Aslamova, e vërtetuar nga shumë shtete se e njëjta ka qenë e angazhuar si spiune për intelegjencën ushtarake ruse e njëherit ka propaganduar mbi pushtimin rus të Ukrainës në rolin e gazetares. Prezenca e saj po konsiderohet skeptike duke pasur parasysh zhvillimet e fundit në veri të vendit.

Ministri i Punëve të Brendshme, Xhelal Sveçla, ka njoftuar se autoritetet e Republikës së Kosovës ishin në dijeni për veprimtarinë e Aslamovës dhe se akterët përkatës po përpiqen t’i zbulojnë arsyet e ardhjes së saj në Kosovë, transmeton Gazeta Online Reporteri.net.

Tutje, sipas Sveçlës, tentimi i saj për të hyrë në Kosovë dëshmon qartë ndikimin që po e shtron Serbia, bashkë me propagandën ruse, për të destabilizuar vendin. /Reporteri.net

Njoftimi i plotë:

Sot, në pikë kalimin kufitar në veri të vendit është ndaluar Daria Aslamova. Shumë shtete e kanë vërtetuar se ajo ka qenë e angazhuar në spiunazh për inteligjencën ushtarake ruse dhe se ka vepruar në petkun e gazetares. E njëjta ka marrë pjesë edhe në luftimet në Ukrainë duke propaganduar mbi pushtimin rus ndaj Ukrainës.

Autoritetet e Republikës së Kosovës kanë qenë në dijeni për veprimtarinë e saj por edhe se në disa shtete ajo e ka të ndaluar të hyjë përshkak të veprimtarisë së saj. Me këtë rast, ajo është ndaluar dhe po vazhdon angazhimi i akterëve përkatës deri në zbardhje të qëllimeve të saj.

Theksojmë faktin se ajo tenton të hyjë në Republikën e Kosovës një javë pas tensioneve të shkaktuara nga strukturat kriminale në veri të vendit dhe në të njejtën ditë kur të njejtat struktura që orkestrohen nga Vuçiqi kanë shtënë rreth 10 herë drejt zyrtarëve tanë policor. Tentimi i saj për të hyrë në vendin tonë përveç që përkon me zhvillimet në veri të vendit, i dëshmon qartë lidhjet dhe propagandën ruse të cilës i është bashkuar tashmë Serbia dhe që kanë për qëllim destabilizimin e vendit tonë.