Prokuroria Speciale e Kosovës ka ngritur aktakuzë ndaj një personi për veprën penale “Nxitja e përçarjes dhe mosdurimit”.

I.P. akuzohet se e ka grisur dhe e ka hedhur në tokë librin e shenjtë të myslimanëve, Kuranin duke përhapur  kështu publikisht urrejtje dhe mosdurim ndaj grupeve fetare.

PSRKS ka propozuar masën e trajtimit të detyrueshëm psikiatrik në liri.

“Sipas aktakuzës, i pandehuri, më 03.03.2025, në afërsi të Teqes “Saraçhane” në Prizren, ka nxitur dhe përhapur publikisht urrejtje dhe mosdurim midis grupeve fetare. Hetimet kanë rezultuar se I.P. e ka grisur dhe e ka shpërndarë në tokë librin e shenjtë të myslimanëve, Kuranin, duke shkaktuar mllef të madh te komuniteti islam dhe duke cenuar bashkëjetesën ndërmjet grupeve me ideologji të ndryshme fetare”, thuhet në njoftimin e PSRK-së.

Prokurori i çështjes, me rastin e ngritjes së aktakuzës, i ka propozuar Gjykatës që i pandehuri të shpallet fajtor dhe t’i shqiptohet masa e trajtimit të detyrueshëm psikiatrik në liri, meqenëse aftësia e tij, në kohën e kryerjes së veprës penale, për të gjykuar dhe kontrolluar veprimet e veta ka qenë e zvogëluar në shkallë esenciale. /Reporteri.net/