Nikaj: Qeveria të mos lejojë t’u dal afati vaksinave, nuk ka urgjencë më të madhe se imunizimi i qytetarëve

Anëtari i Kryesisë së Partisë Demokratike të Kosovës dhe sekretari për marrëdhënie me jashtë i kësaj partie, Bernard Nikaj ka thënë se Qeveria e Kosovës duhet të bëj një plan të vaksinimit, për të mos lejuar që vaksinave që kanë ardhur donacion nga Shtetet e Bashkuara të Amerikës t’iu kalojë afati.


Ai gjatë intervistës për emisionin “Përballje” në Telegrafi ka thënë se duhet angazhim më i madh sepse, nuk ka prioritet më urgjent sesa vaksinimi i qytetarëve.

“Ne duhet të urojmë, shpresojmë e besa edhe të lutemi që këto vaksinat që erdhën Qeveria mos të lejojë të ju dal afati. Sepse, ne realisht ndoshta jemi vendi i vetëm që në një situatë ku ka kërkesë të qytetarëve për vaksinim, nuk ka terminë për vaksinim dhe Qendrat për Vaksinim pushojmë të dielave dhe në të njëjtën kohë ju del afati vaksinave dhe refuzojmë vaksina, sepse nuk dëshirojmë t’i marrim”, tha Nikaj.

Ai shtoi se, “nëse ka një donacion, i hap qendrat e vaksinimit edhe të dielave edhe ekipet mobile, si Belgjika që po ofron edhe në vetëshërbime, e ne ende po sillemi si në vitin 2020, kur nuk ka pasur vaksina”.

Tutje, Nikaj gjatë intervistës tha se nuk ka dallim në masat e Qeverisë së Kosovës këtë vit pavarësisht që tash ka vaksinë.

“Njëjtë është masa si për atë që ka vaksinë, si për ata pavaksinuar. Qeveria duhet ta ndërtoj një plan, të fus ë funksion të gjitha mjetet sepse nuk ka asnjë prioritet më me urgjencë sesa vaksinimin”, tha Nikaj